যোৱা দুমাহত ভাৰতত সোণৰ মূল্য ব্যাপক বৃদ্ধি পাইছে। সোণৰ দাম ইমানেই বৃদ্ধি পাইছে যে মাত্ৰ দুমাহৰ ভিতৰতে সোণৰ মূল্য ১১ হাজাৰ টকা বৃদ্ধি পাইছে। সোণৰ সমান্তৰালকৈ ৰূপৰ দামও বৃদ্ধি হৈয়েই আছে। ৰূপতো দুমাহত প্ৰতি কেজিত ১৩ হাজাৰ টকা ব্যয়বহুল হৈ পৰিছে।
বৰ্তমান ভাৰতত বিয়াৰ বতৰ চলি আছে। ভাৰতবৰ্ষত অতীজৰে পৰা বিয়াৰ সময়ত ইজনে সিজনক সোণ-ৰূপ উপহাৰ দি আহিছে যদিও সোণ-ৰূপৰ মূল্য বিপুল বৃদ্ধিৰ পিছত সাধাৰণ মানুহৰ বাবে সোণ কিনাটো কঠিন হৈ পৰিছে। গ্ৰাহকে সোণ কিনাৰ পৰা আঁতৰি আছে। অহা ১০ মে’ত ভাৰতত উদযাপন কৰা হ’ব অক্ষয় তৃতীয় উৎসৱ। এই দিনটোত সোণ ক্ৰয়ৰ বিশেষ গুৰুত্ব আছে যদিও এইবাৰ সোণৰ মূল্য প্ৰচণ্ড বৃদ্ধিৰ বাবে ইয়াৰ প্ৰভাৱ অক্ষয় তৃতীয় উপলক্ষে সোণ ক্ৰয়ত প্ৰভাৱিত হ’ব পাৰে।
ইণ্ডিয়ান বুলিয়ন জুৱেলাৰছ এছ’চিয়েশ্যনৰ অফিচিয়েল ৱেবছাইটত দিয়া তথ্য অনুসৰি যোৱা ২৩ ফেব্ৰুৱাৰীত ২৪ কেৰেট সোণৰ মূল্য প্ৰতি ১০ গ্ৰামত ৬২ হাজাৰ টকা আছিল, যিটো এতিয়া প্ৰতি কেজিত ৭৩,৩০০ টকালৈ বৃদ্ধি পাইছে। এনে পৰিস্থিতিত দুমাহ নৌহওঁতেই সোণৰ মূল্য ১১ হাজাৰ টকা বৃদ্ধি পোৱা গৈছে।
কেৱল সোণৰ নহয়, ৰূপৰ মূল্যও বিগত দুমাহত প্ৰচণ্ড বৃদ্ধি পঞ্জীয়ন কৰিছে। দুমাহ নৌহওঁতেই ৰূপৰ মূল্য ১৬,৮৪৭ টকা। আই বিজেৰ ৱেবছাইটত দিয়া তথ্য অনুসৰি ২৩ ফেব্ৰুৱাৰীত ৰূপৰ মূল্য ৬৯,৬৫৩ টকা প্ৰতি কেজিত আছিল, যিটো ১৬ এপ্ৰিলত প্ৰতি কেজিত ৮৬,৫০০ টকালৈ বৃদ্ধি পাইছিল।
বিশেষজ্ঞসকলৰ মতে, ঘৰুৱা বজাৰত সোণ-ৰূপৰ মূল্য বৃদ্ধিৰ বাবে আন্তঃৰাষ্ট্ৰীয় কাৰণেই দায়ী। ইৰাণ আৰু ইজৰাইলৰ মাজত ক্ৰমাৎ উত্তেজনা বৃদ্ধি পোৱাৰ বাবে সমগ্ৰ বিশ্বতে অনিশ্চয়তাৰ পৰিবেশ সৃষ্টি হৈছে। এনে পৰিস্থিতিত সমগ্ৰ বিশ্বৰ বিনিয়োগকাৰী আৰু কেন্দ্ৰীয় বেংকসমূহে সোণত প্ৰচুৰ পৰিমাণে বিনিয়োগ কৰিছে। এনে পৰিস্থিতিত সোণৰ চাহিদা বৃদ্ধিৰ প্ৰভাৱ তাৰ দামত দেখা যায়। বিশেষজ্ঞসকলৰ মতে অনাগত কেইমাহমানৰ ভিতৰত সোণৰ মূল্য হ্ৰাস পোৱাৰ আশা কম। এনে পৰিস্থিতিত সস্তীয়া সোণৰ আশা কৰা মানুহে হয়তো ডাঙৰ জোকাৰণিৰ সন্মুখীন হ’ব পাৰে।
FIRST Business Portal addressing the potential of business capability of North East Region.
