২০২৫-২৬ বিত্তীয় বৰ্ষৰ সাধাৰণ বাজেট দাখিল কৰিবলৈ লোৱা সপ্তাহটোৰ প্ৰথমটো ব্যৱসায়িক অধিবেশনত বৃহৎ পতনৰ সৈতে ভাৰতীয় শ্বেয়াৰ বজাৰ মুকলি হয়। চেন্সেক্স ৭৬০০০ৰ তলত আৰু নিফ্টি ২৩০০০ৰ তলত মুকলি হয়। আজিৰ অধিবেশনত মিডকেপ আৰু স্মলকেপৰ ষ্টকত ডাঙৰ হ্ৰাস দেখা গৈছে। বেংকিং, আই টি আৰু শক্তি খণ্ডৰ ষ্টকত বিক্ৰীৰ ফলত বজাৰত ব্যাপক পতন ঘটিছে। কেৱল ৰিয়েল এষ্টেট খণ্ডৰ সূচকাংকই বৃদ্ধিৰ সৈতে ব্যৱসায় কৰি আছে। বিএছই চেন্সেক্সৰ মূল্য ৫৫২ পইণ্টৰ হ্ৰাসৰ সৈতে ৭৫,৬৪৫ পইণ্ট আৰু নিফটিৰ মূল্য ১৫২ পইণ্টৰ হ্ৰাসৰ সৈতে ২২৯৪০ পইণ্টত ব্যৱসায় কৰা হৈছে।
সপ্তাহটোৰ প্ৰথমটো অধিবেশনত বিনিয়োগকাৰীসকলে বৃহৎ লোকচানৰ সন্মুখীন হৈছে। বজাৰত চলি থকা অৱনতিৰ বাবে বিএছইত তালিকাভুক্ত ষ্টকৰ মাৰ্কেট কেপ ৫ লাখ কোটি টকা হ্ৰাস পাইছে। বিএছইত তালিকাভুক্ত ষ্টকৰ মাৰ্কেট কেপ ৪১৩.৩৫ লাখ কোটিলৈ হ্ৰাস পাইছে, যিটো যোৱা অধিবেশনত আছিল ৪১৯.৫১ লাখ কোটি টকা। অৰ্থাৎ বিনিয়োগকাৰীয়ে ৬.১৬ লাখ কোটি টকাৰ লোকচানৰ সন্মুখীন হৈছে।
পুৱাৰ অধিবেশনত বিএছইত ব্যৱসায় হৈ থকা ৩৩৪৪টা ষ্টকৰ ভিতৰত ২৫৬৪টা ষ্টক হ্ৰাস পাইছে আৰু মাত্ৰ ৬০১টা ষ্টকে লাভৰ সৈতে ব্যৱসায় কৰি আছে। ২১০ টা ষ্টকত লোয়াৰ চাৰ্কিট আৰু মাত্ৰ ৮১ টাহে আপাৰ চাৰ্কিট আছে। বিএছই চেন্সেক্সৰ ৩০টা শ্বেয়াৰৰ ভিতৰত মাত্ৰ ৯টা শ্বেয়াৰহে বৃদ্ধি পোৱাৰ বিপৰীতে ২১টা শ্বেয়াৰ হ্ৰাসৰ সৈতে ব্যৱসায় চলি আছে। বুলিছ ষ্টকসমূহৰ ভিতৰত এইচ ইউ এল ১.৪৬ শতাংশ, আই টি চি ০.৭১ শতাংশ, আই চি আই চি আই বেংক ০.৫৬ শতাংশ, মাৰুটু চুজুকি ০.৩৫ শতাংশ, নেচলে ০.২৫ শতাংশ, এছ বি আই ০.০৫ শতাংশ বৃদ্ধিৰে ব্যৱসায় কৰি আছে। জোমাটোৱে ২.৯৪ শতাংশ, টাটা ষ্টীল ১.৭৭ শতাংশ, পাৱাৰ গ্ৰীড ১.৭১ শতাংশ, ইণ্ডুছইণ্ড বেংক ১.২৩ শতাংশ, টাটা মটৰ্ছৰ ১.১৪ শতাংশ, এইচচিএল টেক ১.০৩ শতাংশ হ্ৰাসৰ সৈতে ব্যৱসায় কৰি আছে।
FIRST Business Portal addressing the potential of business capability of North East Region.
